Gjykata e Posaçme e Apelit për Korrupsionin dhe Krimin e Organizuar vendosi të enjten më 1 qershor të lërë në fuqi masën e sigurimit “arrest në burg” të caktuar nga shkalla e parë për Alfred Belerin, kandidat i koalicionit “Bashkë Fitojmë”, për Bashkinë e Himarës, i akuzuar për “korrupsion aktiv në zgjedhje”. Ndërsa i akuzuari si bashkëpunëtor i tij në blerjen e votave, Pandeli Kokoveshi, arriti të sigurojë lirinë pas vendimarrjes së Apelit për ndryshimin e masës së sigurisë nga “arrest në burg”, në “detyrim për t’u paraqitur pranë policisë gjyqësore”. Vendimi u mor nga gjyqtari Florjan Kalaja.
E pyetur për shkaqet e lehtësimit të masës së sigurisë për Kokoveshin, koordinatorja për të drejtën e informimit në Gjykatën e Posaçme të Apelit, Enida Demiraj sqaroi se në seancën e të enjtes është njoftuar vetëm dispozitivi i vendimit, ndërsa arsyetimi ku janë të pasqyruara dhe argumentet për ndryshimin e masës së sigurimit personal, do t’u njoftohet palëve në ditët në vijim.
Avokati i Kokoveshit, Marsel Zhupa pohoi për BIRN gjatë një komunikimi telefonik se shkak i ndryshimit të masës së sigurimit për të përfaqësuarin prej tij, kishte qenë gjendja e rënduar shëndetësore.
Masa e sigurisë për Pandeli Kokoveshin në shkallën e parë, u caktua të zhvillohej në një dhomë spitali në Tiranë, pasi ai shfaqi shqetësime shëndetësore.
Sipas prokurorisë Beleri dhe bashkëpunëtori i tij Pandeli Kokoveshi janë filmuar dhe përgjuar duke i ofruar një bashkëpunëtori të drejtësisë para në këmbim të votave. Një burim në dijeni të hetimeve i tha më parë BIRN se Beleri ishte dakordsuar me bashkëpunëtorin për pagesën dhe paratë ai i ka marrë nga Kokoveshi.
Beleri dhe Kokoveshi u arrestuan në minutat e para të 12 majit, vetëm dy ditë përpara datës kur do të votohej për të zgjedhur kryetarët e rinj të bashkive. Dhionisios Alfred Petro Beleri ishte kandidat i koalicionit “Bashkë Fitojmë” përballë kryebashkiakut socialist të Himarës, Jorgo Goro, që garoi për mandatin e tij të katërt. Megjithëse i arrestuar, ai u shpall fitues i zgjedhjeve të 14 majit për Himarën.
I njohur shkurtimisht si Fredi Beleri, ai ka garuar për PBDNJ-në në zgjedhjet e vitit 2015 dhe fitoi 27% të votave.
Beleri sipas policisë është i dënuar më herët me tre vjet burg për “nxitje të urrejtjes nacionale”. Ai është akuzuar nga përfaqësues të Partisë Socialiste si i përfshirë në atë që njihet si “Masakra e Peshkëpisë” në vitin 1994, kur një grup i armatosur sulmoi një postë kufiri të Shqipërisë duke vrarë dy ushtarakë shqiptarë dhe plagosur tre të tjerë. Beleri i ka mohuar akuzat dhe ka ngritur padi për shpifje ndaj Taulant Ballës për këtë akuzë.